  Agaasimaha Wasaarada Waxbarashada J. Somaliland Cali Cabdi Odowaa ayaa maanta shahaadooyin guddoonsiiyey dufcadii saddexaad ee dhamaysatay Dugsiga Secondary-ga SOS ee Magaalada Sheekh sannad dugsiyeedkii 2007 - 2008. Sawirada
Munaasibad ballaadhan oo ardaydaas shahaadooyin lagu guddoonsiiyey oo ay soo qabanqaabisay Marwo Hinda Maxamed Jaamac oo ka mid ah macalimiinta jaamacada Burco, shirkada Telesom ay maalgelisay, ayaa lagu qabtay Hudheelka Ambassador ee magaalada Hargeisa, waxaana ka qaybgallay Guddoomiyaha xafiiska Manaahijta Qaranka Daaʼuud Axmed Faarax, Suldaan Maxamed Xasan oo ka socday shirkada Telesom, maamulka iyo macalimiinta dugsiga SOS, abwaan Axmed Aw Geedi iyo marti sharaf kale oo aad u tirro badan.
Agaasimaha wasaarada waxbarashada Cali Cabdi Odowaa oo hadal ka jeediyey Xafladaas ayaa xusay in ardayda ka soo baxda dudsiga SOS ay yihiin muraayadda aqoonta ee laga dheehdo horumarka Somaliland, wasaarad ahaana ay ku faanaan.
Agaasimuhu waxaa uu sheegay in masuuliyadoodu tahay siddii ardaydaas loogu raadin lahaa waxbarasho jaamacadeed oo bilaa lacag ah, balse waxa uu ku guubaabiyey ardayda in aanay suurtagal ahayn dhamaantood inay jaamacado helaan, isaga oo u soo jeediyey in ay galaan dugsiyada laga barto xirfadaha si ay u helaan aqoon xairfadeed oo ay ku shaqaystaan.
Maamulaha Dugsiga SOS George Sabon ayaa ka warbixiyey marxaladaihii kala duwanaa ee uu iskuulku soo maray, waxaana uu sheegay in in wakhtigii la aas-aasay oo ku beegnayd sannadkii 2003 lagu bilaabay arday tirradoodu gaadhayso 50 arday balse buu yidhi manta y dhigtaan tirro kor u dhaafaysa 200 oo arday, kuwaas oo uu sheegay in ay jiraaan 40 gabdhood.
George waxaa uu mahadnaq balladhan u soo jeediyey Shirkada Telesom oo uu sheegay inay sannad kasta dirto tobban arday, kuwaas oo uu sheegay inay awoodi kari waayeen fiiggii, waxaa kale oo uu amaan u soo jeediyey Wasaarada waxbarashada uu sheegay in ay dirtay tiro arday ah oo ka soo baxay iskuulka SOS ee Sheekh, kuaaas oo kala jooga yuu yidhi wadamada Yemen, Sudan iyo Ethopia.
Suldaan Maxamed Xasan oo ka socday Shirkada Telesom aayaa ammaan balladhan u soo jeediyey SOS oo sheegay in ay dhistay arday badan, waxaana uu ka warbixiyey taariikhda iskuulka Sheekh oo uu sheegay in uu ahaa iskuuladdii ugu magaca weynaa Geeska, dadkii ka soo baxayn ay yihiin ayuu yidhi hormoodka Somaliland, waxaana uu ku dhiiri geliyey ardaydaasi in aanay dedaalkooda khasaarin ee ay dalkooda iyo dadkooda ugu addeegaan, waxaana uu ballan qadaay in Shirkad ahaan ay sii wadi doonaan deeqdooda waxbarasho ee ay bixiyaan ardaydaas.
Suldaanu waxaa uu ugu baaqay dadka quro jooga ah ee u dhashay dalku inay dhiiri geliyaan ubbadka wax bartay, gacana ka geystaan midhaha dalka.
Hinda Maxamed Jaamac oo soo qaban qaabisay xafladaas ayaa hadal kooban oo halkaa ka jeedisey ayaa ka war-bixisey waxyaabaha ay ardayda ka soo baxda Secondariga SOS ee Sheekh ay dheertihiin ardayda kale, kuwaas oo ay ku sifaysay inay isku darsadeen Akhlaaq, Aqoon, Karti iyo dedaal, taas oo ay sheegtay inay u suura gelisey qaabka markii hore lagu soo xulay ardaydaas iyo cimilada ay ku nool yihiin.
Shiine Cilmi Kaahin - SDWO News Desk - Hargeysa |
Print dufcadii saddexaad arday ka qalin jabisay dugsiga sare ee sheekh/jsl.